walang pakialam si arvie/walang pakiramdam si anne

walang pakialam si arvie

late na naman si arvie. malabo ang mga mata niya. hindi niya agad nakita si anne na matagal nang nakaupo sa bench sa plaza.

trenta y minutos ang hinintay. lagot na naman siya sa mala tigre niyang girlfriend.

paglapit niya dito, sa halip na magmaktol ang babae ay wala naman itong reaksiyon. marahil siguro maraming tao masyado kaya  hindi ito makapag inarte. uwian na ng mga estudyante.

marami nang kasalanan si arvie. ilang araw na siyang hindi nagpapakita kay anne. paano naman kase nakakasawa na ang ugali nito. masyadong selosa. kahit mga kaklase at thesis mates niya pinagseselosan. isama pa ang mga kabarkada niyang babae na palagi niyang kasama sa inuman.

kagabi hindi niya rin sinagot ang text ni anne. nagpapasundo kase ito sa kanya sa alfonso upang makauwe galing sa isang film making project sa school. ngunit dahil lasing at walang pang gasolina nagkunwari na lang siyang hindi niya nasagot agad ang mga text nito.

two years na rin sila ni anne. nakilala niya ito dahil sa isang kaibigan. dahil sa mga buyo naligawan niya tuloy ito nang hindi oras. gayung sa simula naman medyo nagustuhan niya ang dalaga. cute kase ito at matalino. first girlfriend din niya kaya hindi niya na rin pinalagpas ang pagkakataon.

sweet din si anne. mahilig sa surprises. isip bata nga lang na tipong maliit na pagkakamali lang, pinalalaki agad niya. mahilig magmura. mahilig magpahiya. walang pakialam kung eskandalo na ang dating ng away nilang magkasintahan.

pero gayunpaman pinagtiisan niya ito. nahihiya rin kase siya sa pamilya nito dahil mabuti ang mga ito sa kanya.

hindi pa rin nagsasalita si anne. kaya minabuti ni arvie na yayain na lang ito sa sizzling point restaurant.

naglakad sila patungong restaurant. tahimik pa rin ang babae.

naiinis na si arvie.

pagkatapos niyang umorder tinanong niya si anne ano ba ang problema. wala pa rin itong imik. kinakabahan si arvie dahil baka mag freak out ito bigla. sa gitna ng maraming tao at estudyante sa restaurant.

gusto na magtapat ni arvie. ngunit mas pipiliin niyang hindi na lang magpakita sa dalaga kahit kailan. gusto niya nang sabihin kay anne na pagod na pagod na siya sa relasyong ito. isa pa may natitipuhan na rin siyang ibang babae na kapitbahay nila.

lingid sa kaalaman ni anne ito na ang huling pagkikita nila.

________________________________________________________________________

walang pakiramdam si anne

trenta y minutos na ang nakakalipas wala pa rin si arvie. usapan nila magkita sa plaza ngayon. nais niya lang makita ito upang magtanong.  hindi kase nito sinagot ang mga text niya kagabi.

maya maya lang natanaw niya na si arvie, bumaba ng jeepney. halatang hinahanap siya sa mga taong nakaupo sa benches.

muli, nakasimangot ang lalaki. hindi rin maipaliwanag ni anne kung bakit sa tuwing magkikita sila ni arvie parang napakalaking task nito para sa binata.

alam niya rin na ninais ni arvie na sa plaza makipagkita nang ganun hindi siya makapagsimula ng argumento.

hindi man lang siya sinundo ni arvie sa alfonso. hindi tuloy siya nakauwe ng bahay. alam niya pagod ito marahil sa thesis na ginagawa pa sa site sa rosario. kung magsinungalaing man si arvie ngayon, konsyensya na niya yun.

matagal na sila ni arvie. nagkakilala sila sa isang tugtugan. alam ni anne gusto lang nitong magkagirlfriend. mabait naman ito kaya sinagot niya. isa pa naiinggit siya sa lahat halos ng blockmates niya na may boyfriend na. habang tumatagal nagustuhan niya rin si arvie.

alam ni anne madami na siyang kasalanan. kailangan niya sigurong magtake ng anger management upang sa gayun hindi niya masaktan si arvie. ngunit sa tuwing may ginagawa itong kasalanan hindi siya makapagtimpi ng galit.

may ugali din kase si arvie, masyadong mabarkada. mga babae pa ang kainuman kaya lalo siyang nagseselos. palague ding late at walang oras sa kanya.

mukhang mainit ang ulo ni arvie kaya agad na sumunod si anne sa gusto nitong magpunta na lang sa sizzling point.

pagdating doon, napansin ni anne na madami siyang kakilalang kumakain. yumuko na lang siya at tumahimik habang umoorder si arvie. maya maya lang tinanong siya nito ano ba ang problema.

hindi makapagsalita si anne. naguguluhan siya.

marahil mas mabuti pang tumahimik na lang nang sa ganun hindi na muling mainis sa kanya si arvie. pipilitin niyang baguhin ang ugali niya.

tinapos na nila ang  pagkain. wala naman tinatanong si anne ngunit nagpaliwanag si arvie.

hindi niya raw nasagot ang text kase naiwan niya ng phone sa living room at nakatulog na siya agad dahil sa pagod sa thesis.

tinanggap naman ito ni anne. dumaan ang ilang usapan. nakalma na ang kalooban ni anne. nagkuwentuhan sila tungkol sa school at sa mga bagay bagay.

maya maya alas sais na. kailangan na umuwe ni anne. inihatid siya ni arvie sa sakayan bitbit ang ngiti at pag asa na maayos din ang lahat sa kanila.